Аҧсны Аҳәынҭқарра Ахада Бадра Гәынба Жәлар Реизара – Аҧсны Аҳәынҭқарра Апарламент адепутатцәеи Аҧсны Аконституциатә ӡбарҭа аӡбаҩцәеи рҿаҧхьа имаҵзура аанкыларазы аҳәынҭқарра Азакәан Хада излаҳәо ала ҭоуба иуит.

Уа иазгәаҭан : « Ҭоуба зуеит, сымч сылша, схы сыхшыҩ,  сыҧсҭазаара зегьы – сыҧсадгьыли суаажәлари рымаҵ аура ишазыскуа. Сыжәлар ирымҭаны,  снапаҿы иҟало амчра, аҳәынҭқарра Аконституциа иахьатәи уи амши  уаҵәтәи уи аҧеиҧши  рыхьчара схы ишазыскуа».

Анаҩс Жәлар Реизара Ахантәаҩы Лаша Ашәба Бадра Гәынба инапаҿы ииркит Аҳәынҭқарра Ахада имчра ирызку атрибутқәа.