Мшапымза 1 1925 шықәсазы, Аҧсны Асоветқәа ахҧатәи реизара ду аҟны  ирыдыркылеит Аҧсны ахьыҧшымра шьақәзырӷәӷәоз Азакәан Хада. Уа ишьақәырӷәӷәан ареспубликаҿы аҳәынҭқарра анапхгараҭара егьырҭ амчрақәа ирхьыҧшымкәа ишымҩаҧысло.

Азакәан амчра аман 1931 шықәсанӡа, Аҧсны Қырҭтәылатәи АССР автономттә ҳәынҭқарра аҳасаб ала иалалаанӡа.

Аконституциа шьақәгылан 21 хқәеи 116 хәҭеи рыла. Ишьақәырӷәӷәан аҳәынҭқарратә мчрақәа реилазаара, амилаҭтә економика, аҭыҧантәи анапхгараҭара, иара убас алхратә зинқәеи урҭ рымҩаҧгара аҧҟарақәеи.