Хәажәкыра 12 рзы ҳтәылаҟны имҩаҧысраны иҟоуп Жәлар Рфорум . Уи аиҿкааҩцәас иамоуп ҳтәыла  Ауаажәларратә Палата.

Афорум аҽазыҟаҵара аҳәаақәа ирҭагӡаны имҩаҧган атәыла амчрақәа рхаҭарнакцәеи ауаажәларреи злахәыз  «Аполитикатә система ареформа  - аҳәынҭқарра иҭышәынтәаланы аҿиара алзыршо ашьагәыҭ» ҳәа хыс измаз аилатәара.

Уи рхы алалырхәит Аконституциатә ӡбарҭа ахантәаҩы Диана Ҧлиа, ҳтәыла анапхгараҭаратәи азинмчратәи мчрақәа рхаҭарнакцәа, ауаажәларратәи аҭҵаарадырратәи усзуҩцәа.

Ауаажәларратә Палата имҩаҧнагаз аилатәара ҳтәылаҟны имҩаҧысраны иҟоу Жәлар рфорум «Аиҿцәажәара. Аиқәышаҳаҭра. Аҿиара» аҽазыҟаҵара аҳәаақәа ирҭагӡаны имҩаҧган. Иазгәаҭатәуп, ааигәа  ишымҩаҧгаз адемографиеи аҳәынҭқарра асоциал-економикатә ҿиареи ирызку астол гьежьқәа ҩба.

Ас еиҧш иҟоу аилатәарақәа  қәкыс ирымоуп ҳҳәынҭқарра аҿиара ахырхарҭа хадақәа ралкаара,  ауаажәларра ргәаанагара аилкаара. Иалкаахо ахырхарҭақәеи азҵаатәқәеи алагалахоит ирыдыркылараны иҟоу Афорум арезолиуциа.