Аахыҵ-Уаҧстәылатәи аҳәынҭқарратә университет аҟны имҩаҧысит аҩганк русеицура аҳәаақәа арҭбаара иазку Аҧсны Аконституциатә ӡбарҭа ахантәаҩы Диана Ҧлиаҧҳаи  Аахыҵ- Уаҧстәылатәи аҳәынҭқарратә университет аректор Вадим Тедееви реиҧылара. Аиҧылара иара убас иалахәын Аҧсны Аҭҵаарадыррақәа Ракадемиа аекономикеи азини Ринститут аиҳабы Фатима Камкьиа, Аахыҵ-Уаҧстәыла иҟоу  Аҧсны ацҳаражәҳәаҩ Алан Елбакиев, Аахыҵ-Уаҧстәыла Иреиҳау аӡбарҭа ахантәаҩы Витали Џьоев.

Аиҧылара қәкыс иаман, иаҳхысыз ашықәс абҵарамзазы Аҧсны Аконституциатә ӡбарҭеи А.А. Тибилов ихьӡ зху Аахыҵ-Уаҧстәылатәи аҳәынҭқарратә университети аусеицуразы ирыбжьарҵаз аиқәышаҳаҭра алҵшәақәеи уи ҧхьаҟатәи аҽиареи. Амеморандум аҳәаақәа ирҭагӡаны иазгәаҭан аҩганк рыбжьара аҭҵаарадырреи аҧышәа аизырҳареи уҳәа реиҧш иҟоу ахырхарҭақәа рыла аусеицура.  

Аҧсны Аконституциатә ӡбарҭа ахантәаҩы Диана Ҧлиаҧҳа Вадим Тедеев иҭабуп ҳәа иалҳәеит иҟаиҵаз ааҧхьаразы, иара убас иазгәалҭеит, аҩганк ирыбжьоу аиқәышаҳҭра алҵшәа бзиақәа шамоу. Агәыӷрагьы аалырҧшит аҧхьаҟагьы русеицура аҳәаақәа арҭбаап ҳәа.

Аиҧылара аамҭа иалагӡаны ирылацәажәеит аусеицура хадара змоу ахырхарҭақәа, урҭ раларҵәара, аус рыдулашьа, иара убас аҩганк рыбжьара  аҭҵаарадырратә уснагӡатәқәа реицымҩаҧгара, аҧышәа аизырҳара иазку ауснагӡатәқәа реиҿкаара.