Абҵарамза 25-28 М.В.Ломоносов ихьӡ зху  Москватәи аҳәынҭқарратә университет аҟны имҩаԥысуеит  XV   Азиндырра амчыбжь. Уи лхы алалырхәит Аконституциатә ӡбарҭа ахантәаҩы Диана Ԥлиа.

Азиндырра амчыбжь аҳәаақәа ирҭагӡаны иазгәаҭан актуалра злаз атемақәа ирызкыз аҭҵаарадырра-практикатә конференциақәа. Урҭ иреиуоуп  Урыстәыла азиндырыҩцәа рмилаҭтә Еиҿкаара 10-шықәса ахыҵра иазкыз Жәларбжьаратәи аҭҵаарадырра-практикатә конференциа : «Аамҭа ҿыц ицәырнаго ашәарҭареи аԥышәарақәеи раан ауаажәларра напхгараҭара аформақәеи аметодқәеи».

Диана Ԥлиа лажәахә аамҭа ҿыц ицәырнаго ашәарҭареи аԥышәарақәеи раан Аԥсны аҳәынҭқарра ауаажәларра напхгараҭара  аусура иазкын.  

Жәларбжьаратәи аҭҵаарадырра-практикатә конференциа ахыркәшамҭаз Амилаттә зиндырыҩцәа реиҿкаара ахада, Воронежтәи аҳәынҭқарратә университет аректор Иури Старилов Аԥсны Аконституциатә ӡбарҭа ахантәаҩы, Жәларбжьаратәи азиндырыҩцәа Реиҿкааратә ҟәша алахәыла Диана Ԥлиа аҭҵаарадырра аизырҳаразы иланаишьеит аҳаҭыртә премиа, иара убас Жәларбжьаратәи азиндырыҩцәа реиҿкаара жәларбжьаратәи реимадара аизырҳаразы иланаишьеит аҳаҭыртә шәҟәы.