Аҧсны Аконституциатә ӡбарҭа ахантәаҩы Диана Ҧлиа лхы алалырхәит Аҧсны Алхратә комиссиа Хада аҧшьгарала Аҟәа имҩаҧысыз аҭҵаарадырра-практикатә конференциа.

Аконференциа иалахәын Аҧсны, Аахыҵ-Уаҧстәыла, Урыстәыла уҳәа рҟынтәи аҵарауаа, азанааҭдырҩцәа. Иара убас ааҧхьара рыман Италиа, Франциа, Кениа, Аладатәи Кореиа, Аргентина атәылақәа рҟынтәи жәларбжьаратәи анаҧшыҩцәа.

Аҭҵаарадырратә конференциа аҟны ишьҭыхын алхрақәа рымҩаҧгараҟны аамҭа ҿыц ицәырнаго аҿыцрақәеи ауадаҩрақәеи.

Аҧсны Аконституциатә ӡбарҭа ахантәаҩы Диана Ҧлиа лықәгылараҟны иазгәалҭеит ҳазну аамҭазы адунеи аҟны имҩаҧысуа аиҭакрақәа иҿыцу аҧҟарақәа шышьақәнаргыло, ишцәырнаго иҿыцу азҵаатәқәа. Аҳәынҭқаррақәа русеицура аҳәаақәа шарҭбаауа. Лара иара убас иазгәалҭеит, адунеи аҟны имҩаҧысуа аиҭакрақәа алхратә системеи аҳәынҭқаррақәа ралхратә институтқәеи русура ишаныруа, ишаланагало аиҭакрақәа. Ас иҟоу аҭҵаарадырратә знеишьа иалнаршоит аҵарауаа, аполитикцәа, ауаажәларратә усзуҩцәа рҧышәа аимадара. Уи абзоурала иалыршахоит алхрақәа азакәан шьаҭа рыҭан рымҩаҧгара.