Аҧсны жәлар Рџьынџьтәылатә еибашьраҿы игаз Аиааира - 32 шықәса ахыҵит.

Аиааира амш аҽны аҳҭнықалақь Ахьӡ-аҧша апарк аҟны иргәаладыршәеит ари амш зырааигәаз аибашьцәа. Шьыжьнаҵы иҭахаз рбаҟа аҿаҧхьа ашәҭ шьыҵәрақәа шьҭарҵон ҳтәыла анапхгара, ауаажәларра рхаҭарнакцәа. Ауснагӡатә рхы аладырхәит Аҧсны Аконституциатә ӡбарҭа Ахантәаҩы Диана Ҧлиа, Аконституциатә ӡбарҭа аӡбаҩцәа, Аппарат ахаҭарнакцәа.

413 мшы ицоз Аџьынџьтәылатә еибашьра хыркәшан цәыббра 30, 1993 шықәсазы.

Игаз Аиааира афырхаҵареи агәымшәареи ирсимволны ишьақәгылеит. Уи иаанарҧшит аҧсуа жәлар рыҧсадгьыл ахь ирымаз агәыбылреи ирылааӡаз ахақәиҭратә қәҧареи.