Абҵарамза 26 иазгәарҭоит Аҧсны аҳәынҭқарра Аконституциа амш.

1994 шықәса рзы абҵарамза 26 рзы ирыдыркылаз Аконституциа -  азин шьаҭа змоу аҧсуа ҳәынҭқарра аргылара  шьаҭас иаиуит. Хықәкы хаданы ишьҭнахит амилаҭ рзинқәа рыхьчара. Илнахит ихьыҧшым аҳәынҭқарра амҩа.

Абҵарамзазы ирыдыркылаз Азакәан Хада аҧсуа жәлар рхақәиҭратә қәҧара иалҵшәахеит. Уи ианыҧшыит амилаҭ рцәаҩа ҟазшьа, ҧхьаҟатәи аҧеиҧш азы рхықәкқәа.

Аҧсны Аконституциатә ӡбарҭа Ахантәаҩы Диана Ҧлиа иҟалҵаз адныҳәалараҿы иазгәалҭеит : «Абҵара 26, ҳҳәынҭқарразы хадара зуа ныҳәоуп – Аҧсны Аконституциа иамшуп! Ҳмилаҭ рхақәиҭреи рхьыҧшымреи ирсимволуп.

Иҳамоу Аконституциа абзоурала, дарбанзаалкь Аҧсны иқәынхо  имоуп алшара, азин шьаҭа змоу аҳәынҭқарраҿы анхареи аҿиареи рзы. Ҧхьаҟатәи аҧеиҧш аргыларазы.

Иахьа, даҽазнык иаҳгәалаҳаршәап ари амш аҵакы. Даҽазнык ҳазхәыцып ҧхьаҟатәи аҧеиҧш аҿиаразы досу иаҳуалу.

Гәыкала ишәыдысныҳәалоит ҳҳәынҭқарра Аконституциа Амш! Ишәзеиӷьасшьоит агәабзиара, агәамч, аҭышәынтәалара, Ҳаҧсадгьыл – аҿиара, аҧеиҧш бзиа!»