Рашәарамза 26-28 Санкт-Петербург имҩаԥысуан ХII Петербургтәи Жәларбжьаратәи Азиндырратә форум. Афорум ахь ааҧхьара рыман  Аԥсны Аконституциатә ӡбара ахантәаҩы Диана Ԥлиаԥҳаи Аконституциатә ӡбара аӡбаҩ Алиса Бигәааԥҳаи.

Петербургтәи Жәларбжьаратәи Азиндырратә форум еиднакылеит 54 ҳәынҭқарра рхаҭарнакцәа. Уи қәкыс иамоуп азиндырратәи, аполитикатәи, азакәанҧҵаратәи аусхкқәа рҟны аусеицура, аҧышәа аимадара.

 «Аконституциатә закәан ахылаҧшра аинститут Аҧсны Аҳәынҭқарра аҿиара ақәкы хада» абас ахьӡын   афорум аконференциаҟны Аҧсны  Аконституциатә ӡбара ахантәаҩы Диана Ԥлиаԥҳа лажәахә.

Лара   лықәгылараҿы иазгәалҭеит : «Абҵара 26 рзы, Ихьыҧшым, Зхы иақәиҭу Аҧсны Аҳәынҭқарра  Аконституциа 30 шықәса ахыҵуеит. Аҧсны Аконституциа - азакәан хада аҧҟарақәа ирықәшәоит.

Аконституциатә закәан ахылаҧшра аинститут қәкы хаданы иамоуп Аҧсны Аҳәынҭқарра  амчрақәа, аҳәынҭқарратә маҵзуҩцәа, атәыла ауааҧсыра Аконституциа азакәанқәа рықәныҟәара ахылаҧшра аҭара.